Tuesday, February 15, 2011

MY MIND FLIES UNDERWATER

Mumbling the Incomprensible

Ingon sila nga ang tawo gahi ug ulo. Tinuod gani nga ang ulo gahi g'yud. Mao gani nga kung mapakong 'ta, di man g'yud mabuak ang atong ulo. Sa mga aksidente diin ang ulo mapantok taman sa gahi nga butang, niining hitaboa pwede g'yud nga ang ulo mabuak. Tungod sa kagahi sa atong bagul-bagol, gamay lang nga hangin o' kaha tubig sulod sa ulo, makaboang kundi man makamatay na dayun sa tawo.

Lisud diay kaayo kung ang ulo masudlan ug hangin. Dili kini mogaan, kun dili mabug-at samot sa kaboang. Karon nga ako naglibog sa lunsay mahitungod sa akong kaugalingon, sa gimahal ko nga yutang natawhan, ug maski gani ang kagubot sa Egypt nga nikalabat na hangtud sa Yemen ug Iran, nasudlan na kaha ug hangin akong ulo? Mora-mora ug mao na g'yud kini ang nahitabo.

Dili ba 'pod kaha nga nalibog ko tungod sa kainit sa panahon? Pero ning-ulan man pipila na ka adlaw ang milabay. Bugnaw na ang palibot, pero ngano man nga gubot gihapon akong panghunahuna? Eksakto man pod unta ko sa kaon. Hinoon, naa na pod koy gibati sa akong lawas. Pero di man ko mahadlok na nga mamatay, so dili ni ang nagpagubot sa akong ulo daw lukot. Kung ako maglingkod, mag-inusara diha sa balay nga wala man unta'y gibuhat o' kaha gikalingawan, moandar g'yud ako kaboang ug kalabad sa ulo. Naunsa na!

Nagkatigulang na pod ra ba hinoon ko. Pero sa gikaingon ko na, di man pod ko mahadlok mamatay na, basta di lang pod ko mag-antos sa kasakit. Seguro, naa pa ko gusto mahimo o' kaha makab-ot dayun ako na nga nasuta gamay na lang ang panahon. Kini ba kaha ang nakapalabad sa kong ulo? Gabati ra ba ko sa akong dalunggan dayun naa usahay tubig nga mogawas. Wala kaha masudli ug tubig ako ulo? Ug unya nalumos na akong utok? Kalooy sab sa. Pero nahurot na seguro ang tubig kay wala naman gaagas sa akong dalunggan.

Gikapoy na 'pod ko sa akong trabaho. Momata ko ug sayo, dayun ang akong tibuok adlaw pare-pareho na lang ang mahitabo. Puol ba kung ingnon ta. Dayun ang mga kabatan-unan karon dili na nako maangkasan pa. Lisod, ingnon ta spellingon. Napulo'g duha na 'pod ko katuig sa akong trabaho. Seguro nagpuol na gyud. Gusto ko gamay excitement sa kinabuhi. Gusto ko mopalayo una, ug didto sa layong dapit magpahulay ug magpractice sa ug kamatay.

Ang akong kinabuhi karon fake kaayo. Daghan ko ug gihimo nga dili gyud ako ug mas daghan pa gyud unta ko ug gustong himoon pero dili ko mahimo sa pagkakaron. Maldito ko ug Scorpio pa gyud - lala kung mangitik, makamatay pa gani sa hustong timing. Puno na kaayo akong utok sa kaboang dayun gusto na kini nga mogawas. Kung sa tanga pa, kulang kaayo sa labok ug itik. Ako na hinoon ang nalanag sa akong kaugalingong kabangis. Hinay-hinay mura ako ug nahilo na sa akong kaugalingong kaboang. Dili gyud kini tungod sa hangin o' kaha sa tubig ni'ng akong utok.

Lisod kaayo kining kinabuhi ta nga wala na gasubay sa atong panag-ingnan. Ang langgam nga unta galupad-lupad kung ihawla magaluya. Di ba kung ang isda haw-ason ta sa tubig, mamatay? Ang tawo pag-ihikaw mo na kaniya ang iyang kagawasan, maboang. Kung imo nga pugson ang tawo pagpuyo sa kinabuhing bakak, daw wala siya mabuhi ning kalibotan kay buhi man siyang patay nga matag adlaw kanimo nakig-uban. Ablihi ang mga mata ug tutuki ug tarong. Kini bang tawo nga sa kong atubangan ania karon, tinuod ba o' kaha dakong bakak. Boang lang seguro kay humok na ang bagul-bagol.




No comments:

Post a Comment